من خطيب بدلة إلى الأصدقاء

[خطيب بدلة]

الأصدقاء في موقع إدلب الخضراء
تحية طيبة وبعد:
إنني بصدد تأليف كتاب ضخم بعنوان "المستطرف الكبير" أجمع فيه الطرائف المعاصرة وأدونها في الكتاب. الشرط الأساسي لهذه الطرائف أن تكون بعيدة عن النكتة الشائعة التي تروى في المجالس أو في برنامج (لول). والشرط الثاني ألا تكون نكتة تراثية، لأن ثمة كتباً كثيرة جمعت فيها النكت التراثية. ما أريده بالضبط: الطرفة التي حصلت في بيتنا، أو في الشارع، أو في المقهى، أو في المدرسة، أو في الوظيفة، وأضحكت الناس في حينها.
إذا كنتم أيها الأصدقاء تعرفون بعضاً من هذه الطرائف، أرجوكم أن ترسلوها إلي على العنوان الإلكتروني التالي: (merdas@scs-net.org)
وإنني على استعداد لأن أذكر اسم مرسل النكتة في الكتاب، أو أغفله، بناء على طلب المرسل.

[عبدو كارم هامو]

أستاذ خطيب .. ننتظر كتابك بفارغ الصبر
لاشك أنه سيكون طريف جداً وسيجمع قرّاء كثر

من فترة حصل معي موقف مضحك ( ربما ) :

كانت الشمس على وشك الشروق .. ومازلت مستقيظ أكلم حبيبتي دون أن أشعر بالوقت

وكان عليّ الاستيقاظ مبكراً في اليوم التالي بسبب العمل

في الصباح استقيظت متأخراً .. وجاءتني الصدمة عندما نظرت إلى ساعة الحائط
فهرعت للمغلسة دون وعي ..

والتقطت فراشة أسناني بيد .. وانا أفتح الحنفية باليد الأخرى

ونتيجة اللاوعي الذي كنت فيه .. التقطت علبة المعجون التي كانت بجانب علبة معجون الأسنان
وكانت علبة معجون الحلاقة

وضعت القليل منه على الفرشاة وبدأت بالتنظيف ..
حينها استعدت كل الوعي الذي فقدته .. ( والله لا يرويك على الطعم الذي شعرت به )

شعرت ذلك اليوم أن أسناني أصبحت ناعمة بدلاً من أن تكون بيضاء .. ولم يفارقني الطعم إلا بعد فناجين عدة من القهوة
_________________

[مرح]

بالتوفيق عمو .............
والله ياعبدو التجربة طرفة حلوة كتير وخلتك تكتشف جودة معجون الحلاقة......
_________________
أمي ياملاكي ياحبي الباقي للأبد          ولم تزل يداكي أنشودتي ولم أزل ولد

[أبو العصام]

البارحة اتصلت بالمنزل .. رد ابني ذو الأعوام الأربعة والاشهر الأربعة ، ولما كنت منشغلا فقد اتصلت دون أن أرفع السماعة " أي بواسطة الأنترفون " فقال لي : ألو وقلت ألو .
لم يسمعني وقال ألو ثانية ولكن بصوت عال ..
للمرة الثالثة قال : ألوووووووووووو
عندها رفعت سماعة الهاتف ..

قلت له : ليش عم تعيط يا حبيبي .. ؟

قال : إي أنا ما بعرف إنك بابا يا دب !

[ربيع شعار]

والله يا أبو مرداس عليك بالأستاذ : صبحي حميدان * أبو عبدو شيخ الشباب * !!!!
_________________
ربِّ اغفر لي و لوالديَّ و للمؤمنين يوم يقوم الحساب

[yahia yusef]

في أخر ظاهرة لخسوف الشمس في منطقة الشرق الأوسط أظنه في عام 1999
كانت هناك حملة اعلامية مسبقة لهذه الظاهرة الفريدة وكانت الناس تستفسر عنها
فكانت جارتي الجميلة تتسائل عن هذه الظاهرة ومدى خطورة النظر اليها
فشرحت لها بكل سرور واسهاب عن الظاهرة وبأن القمر سيحجب أشعة الشمس عندما يمر بينها وبين الارض والنظر الى الشمس يضر بالعيون بسبب أشعة الشمس الساطعة
فقالت : واذا حدث هذا الخسوف بالليل ممكن نتطلع على الشمس .... ؟ !!
فقلت بنفسي : ايه ... الحلو ما يكملشٍ

*******
كما حكى لي صديق لي من الموصل بأن كل أدوات الاعلام في العراق كانت تحذر من النظر المباشر للخسوف واذا كان ولا بد فيجب أن ينظر الناس للخسوف من خلال صورة أشعة سينية
ومع ذالك فقد كانت عدة حالات حرقة في العين من جراء النظر للشمس
والسبب بأن البعض كان ينظر الى الشمس بعين واحدة من خلال صورة سينية بعد أن لفها مثل القمع واخذ ينظر من الفتحة السفلى الأصغر
**********

هناك حادثة ذكرتها مرة في الموقع منذ سنوات ولا مانع من تكرارها تلبية لطلب الاستاذ أبو المراديس

ايام العزوبية والدراسة كنت اسكن في بيت متواضع ولكن له حديقة واسعة
كان صاحب البيت يربي أرانب في أقفاص وأنا كان عندي كلب صغير نسبيا سمح لي صاحب البيت بتربيته بشرط أن أهتم بأمره ( من طعام وتنضيف مخلفاته )
وفي احدى الليالي دخلت الى باحة البيت لأجد الكلب يحكم قبضته على رقبة أرنب أبيض من أرانب صاحب البيت
فتحايلت على الكلب وخطفت الأرنب من بين أنيابه .. و دخلت به الى الحمام لأغسل التراب عنه بالشامبو ثم جففته بمجفف الشعر وسرحت وبره بالمشط وتسللت الى أقفاص الأرانب لأجد صندوق فارغ أعدت اليه الأرنب وعدت انا الى غرفتي ... وصحيت في الغد مبكراً لاشاهد ردة فعل صاحب البيت
ورايته ينظر الى الأرنب الفطسان بتعجب
فقلت له : شوخير ان شاء الله ؟ شايف أرنب فطسان ... لا يكون أصابه مرض
فقال : نعم ... ولكن العجيب بالأمر بأني دفته مساء أمس في ايدي هذه بالجنينة .... !!!
_________________
تحياتي ............ .أبو عادل

[محمد صخر بعث]

وكلني أحدهم لإخلاء سبيله من السجن ، ولم يخل القاضي سبيله إلى بعد اثنين وأربعين يوما .
وبنتيجة المحاكمة حكم عليه بالحبس شهرا واحدا ! .

ولما بلغه القاضي القرار قال له : يا سيدي أنا نمت 42 يوم ، طيب ليش ما طالعتني بعد شهر إذا بدك تحكمني شهر ؟!!
تلعثم القاضي ولم يجب ..
أضاف موكلي : طيب يو ابن عمي معليش أنا سامحتك بس بدك تحسبلي ياهن من الحبسة الجاي .. اتفقنا ؟
_________________
المحامي محمّد صخر بعث

[محمد11]

السلام عليكم ورحمة الله

كنا بالبرية عندنا بالشقة تعشينا وقلنا للشباب بتشربوا شاي قالوا منشرب

رحت وعبيت ابريق الشاي وشغلت الغاز

قلت يالله مرة وحدة بيغلي البراد بجيبوا وبجي لعند الشباب

شغلت أول سيجارة وماغلى الإبريق وشغلت ثاني سيجارة وكمان ماغلى البراد

وأنا بتذكر إني شغلت الغاز

لمست عالإبريق ولا بارد أي شو هالشغلة

أتاريني مشغل الغاز وماني حاطط البراد على الراش المشغل

تحياتي أبو مرداس

[المغترب الادلبي]

سماع ياابو مرداس هالنهفتين من نهفات جدي الله يطول بعمرو والي صار عمرو هلأ 100 تقريبا

مرة كان رايح جدي عالسهرة والدنيا شتي وطين هالحكي ايام زمان وهو بنص الطريق ويقلك الكريم خود وكبس بهالمطر

ماوصل لعند الجماعة الا وكان اكل نصيبو من المطر تماما

دخل لعند الجماعة وهوي عبشرشر من المي قام واحد سألو اشو مطر برا

قام قلو والله ماطلعت لفوق .. (اي مانك شايفو عبشرشر شرير اشو هالسؤال هاد ) !!!


ومرة كمان على ايام زمان اول واحد من صحابن اللي بحبو يكذبو جايب ناضور (منظار) وعبورجيه لهالشباب

وعبيكذب عليهن

بحكم انو كان لسه شغلة جديدة وماحدا بيعرف فيه كتير

وقاعد عبقلن ياشباب درتو شمال ولا بينت انطاكية قدامي متل ماني شايفكن

درتو مغرب (غرب) شفت جبال الللذقية

درتو شرق شفت مابعرف اشو

قام قلو جدي منيح اللي مادرتو قبلة (جنوب) كنت شفت مدائن صالح !!

ولسه في نهفات كتيرة منوافيك فيها عالايميل ان شاء الله ..

تحياتي استاذ خطيب ..
_________________
الوطن غال والوطن عزيز
والوطن شامخ والوطن صامد
لأن الوطن هو ذاتنا فلندرك هذه الحقيقة
ولنحب وطننا بأقصى مانستطيع من الحب
وليكن وطننا هو المعشوق الأول الذي لايساويه ولا يدانيه معشوق آخر ..
القائد الخالد حافظ الأسد

[إدلبية وأفتخر]

مممممم يا عمي رح قلك هالقصة

كانت الدنيا شتي وكبس مطر وكان ايام امتحانات بالجامعة ( هالحكي طبعا بسوريا )

كنت عم حضر على اساس تاني يوم عندي مادة ... وتاني يوم الصبح والدنيا سلخ مطر
طلعت على حلب .. وصلت عالجامعة ماشفت حدا من زملائي

رحت اتطلعت عالباب مالقيت شي بتفصيل الجدول انه في مادة بتذكر علم النفس العام
سألت الآذن عن المادة .. قلي والله يا انسة انتي غلطانة مو اليوم المادة بكرة انشالله .. درسي منيح



_________________

[yahia yusef]

الوقت متأخر ... والجو ماطر
ولا يوجد في محطة سيارات الاجرة ( تاكسي ) غير شوفير واحد
فسأله أحد القاصدين : كم اجرة التاكسي الى سراقب
فأجابه الشوفير : 200 ليرة
- يوجد معي 150 ليرة فقط ... وأعدك بأني سأكمل لك الاجرة في فرصة أخرى
- روح خاي الله يسهل عليك ... شو فاتحين تكية .. .؟
فكر القاصد قليلا" ثم عرض على شوفير التاكسي أن يوصله بهذا المبلغ ( 150 ) وسيكمل الطريق مشيا" على الأقدام .
فقبل السائق .... وقبل سراقب ب 5 كم . قال له : تفضل خاي خلصو مصرياتك .
ورجاه القاصد أن يكمل معروفه في هذا الجو .... فرفض .

وبعد اسبوع حضر القاصد نفسه الى محطة سيارات الاجرة يبحث عن الذي قطعه في المطر
فوجده ينتظر في سيارته .. وكانت الرابعة او الخامسة ( عالدور ) .
فسأل الأول عالدور : بكم لسراقب ... ؟
فأجابه الأول : ب 200 ليرة
- رح أعطيك 400 ليرة بشرط تبوس ايدي وش وقفى ... !
- ما فشرت .
- سأل الثاني والثالث والرابع نفس السؤال ... والكل يرفض شرطه المذل ... بشتيمة .
حتى وصل الى مبتغاه ( السائق الخامس ) وسأله :
- بكم لسراقب ... ؟
- ب200 ليرة
- شو رأييك .. رح أعطيك 300 بس بدي منك خدمة بسيطة
- شو هي
- انك تلوح بيدك لكل هؤلاء السائقين أمامك ... وتتبسم لهم .
- ايه شو عليه ... تكرم خاي .... !
_________________
تحياتي ............ .أبو عادل

[إدلبية وأفتخر]

مرة من المرات انا الست عهد راييحين مشوار .. بادلب طبعا

نزلنا من البيت .. ونحنا عم نمشي ...
اجيت لانزل من الرصيف .. كان في حدا عامل عصير بندورة .. وكابب القشر جنب الرصيف ( الله يكسر ايديها )

وانا مو منتبهة .. طبششششششش على وشي ...
كل الناس اجت مشان تساعدني قوم .. وامي واقفة ... بعد ما قمت وبدي ارجع البيت مشان غير تيابي ... بتقلي امي ( عهد ) معلش اضحك
وفررررررررطت ... طبعا هي ما ساعدتني حابسة الضحكة

_________________

[إدلبية وأفتخر]

ومرة من المرات

كنت بالبيت بادلب ... والملل قاتلني
فجأة
رن رن ... دق الجرس تبع البيت .. فتحت الباب .. و قلت مين .. قالتلي مرحبا .. قلتلا اهلين
قال لك خيت عندك بنات للخطبة
طبعا انا .. قلت اجت على ايديها واجريها
قلتلا اي عندي شو طلبك .. قالتلي ابني عندو هونداي بسوق الهال وقلت بركي عندك طلبو
قلتلا عندي اربع بنات كل وحدة بتقول للقمر قوم للاقعد محلك ...
وهي زحل مخا ...
قالتي وين البنات .. قالتلا يا عيب الشوم منك البنات معزومين عالغدا عند بيت خالن
اذا بدك تعي بكرة ...
وهي تقلي شو مواصفات البنات .. قتلا عيون خضر وشعر اشقر

وهي تقلي ييييييييييييي فرحتيني من كل قلبي
طبعا كل هالحكي عالباب ( قتلا العفو منك ابو البنات ما بريد حدا يفوت عالبيت بغيابو )
قالتلي لكن يا خيت هيك الاصول
لكن انشالله بكرة بجي بشوف البنات قلتلا اي اكيد .. قالتلي اي ساعة .. قلتلا عالساعة 4
قالتلي انا من سراقب وبكرة بجي من بكير انشالله وبشوف البنات

المهم تاني يوم المخلوقة ما كزبت خبر واجت الساعة 4 بالضبط .. هي وكومة نسوان ..
دقو البااااااااااااااااااااااااب .. لنحرق الجرس ومافتحت ...
يومها ضحكت ضحك .. الله بيعلم فيه





_________________

[إدلبية وأفتخر]

انا شايفة الكتاب ررح يكون كلو من حكاياتي


اكيد بتعرفو وقت بروحو البنات عالاعراس .. بطلعو متل القمر الا شوي

ووقت الوحدة بتتطلع فيهن .. بتطير عقلن

وفي يوم من الايام انعزمت على عرس وحدة بعرفا .. رحنا مجموعة بنات
والعرس رقص وغني ودبك .. بتعرفو انتو

ما شفت غير وحدة ست كبيرة .. تتطلع فيني وتزلغطلي .. وتقوم ترقص حوليي ..
كل ما قمت ارقص تقوم هيي معي

المهم مالكن بطولة السيرة
.. وانا قاعدة عالطاولة بين هالصبايا .. نادتلي
رحت لعندا .. قالتلي لك بنتي انت بيت مين وين دراكن .. مين اهلك

قلت هي هيي...


قالتلي اشو عمرك .. قلتلا 21 .. قالتلي ما شالله .. هيك ابني بدو

من بيت مين لك بنتي .. قلتلا من بيت المسعود
قالتلي يوه من وين انتو .. قلتلا نحنا مو من ادلب اصلنا ..
قال وين دراكن .. وين امك هي هون بالعرس ... قلتلا .. امي ميتة انا عايشة عند عمتي
(رح تبكي المخلوقة ).. قالتلي ابني اشقر بعيون ملونة عمرو 25 بدو هيك وحدة متلك ... وتزلغلط وانا من جوا عم اضحك من قلبي

قلتلا خالة عن اذنك .. قال طيب هاتي الرقم .. قلتلا طيب بس اكتبلك ياه بعطيكي ياه

رحت عالطاولة عم احكي للصبايا .. وهننن طبعا بيعرفو فصولي ..
شوي نادتلي المخلوقة .. قالتلي هي لقيت كرت لابني العريس اللي عم قلك عليه

وعينكن ما تشوف الا النور ....
شب اشقر واقف على هونداي لابس بنطلون جينز مدري كم كسرة ضيق من تحت .. ولابس كسرية .. جاكيت جينز مفتوحة لابس تحتا قميص داخلي ابيض ( شكيت انه عم يعمل دعاية ) وفوقن منشفة زرقا لاففا على رقبتو
الشعر اشقر بتقولو صبة بيتون .. وطراش غررة ما يبلى ...
انا غط على قلبي من الشوفة
قالتلي هي السيارة الو ها .. قلتلا الله يحميه
ومكتوب عالكرت .. ابو سمير شيخ الشباب
اخدت هالكرت .. ورجعت عالطاولة عند الصبايا ... من كتر الضحك .. دمعو عيوني

حطيت الكرت تحت الغطا تبع الطاولة .. وكل شوي شوف الكرت وقلن لرفقاتي( اشووووووووووفووو اشووووووووفو ) والمخلوقة تتطلع فيني وبتسم اشكال الوان

ومشان كمل الفلم بقا .. طبعا عطيتا رقم بيتنا القديم .. اللي مقطوع

وكل شوي قوم ارقص واتدلل عليها وهي تزلغط .. وتقلي ما تبلي يا عروستنا وانا ابكي من الضحك


طبعا لسه الافلام ما خلصو .. سلام
_________________

[إدلبية وأفتخر]

جد شايفة الكتاب رح يكون على قصصي
ومن قصصي هالقصة


مرة من المرات ... وكانت الدنيا شتي .. دقتلي بنت عمتي تلفون تعي سهري
وبعد محايلات كتيرة ...قلتلا طيب جاية
قالتلي جيبي الاركيلة وتعي .... قلت يا بنت خطي قاعدة لحالا .. عمتي كانت بالعمرة

المهم لبست وضبيت هالاركيلة .... وبرا كبس مطر يا لطيف ... وصلت لعندا
واجينا نعمل الاركيلة ... اكتشفنا انه نسيت النربيج ..


اي والحل .. قالتلي مابعرف .. وتقلي روحي جبيه وتعي ... الله يوفقك قلا هء هء مابروح برا مطر .. وصارت الوقت متأخر


وبعد تفكير طويل .. وصلنا انه قطعنا شوي من نربيج الشطف وحطيناه ومشي الحال وشربنا اركيلة

ونمنا ... تاني يوم فقنا من النوم .. والموضوع عادي

ولما اجت عمتي من العمرة (عقبال عندكن الهي ) بدها تشطف ..قالت لك ليش هالنربيج قصران ؟؟؟

قلنالا عملنا هيك مشان الاركيلة نسينا النربيج

قالت ... تضربو هاد بنكش فيه البلوعة





وسلامتكن
_________________